水手10連敗頹爆
周三下午澳職上演一仗，中岸水手主場硬撼墨爾本城。水手今季聯賽頹勢未止，近期更加慘錄10連敗劣績，尤其後防表現勁唔爭氣，失球數字高企，今場就算有主場之利，但面對前列分子墨爾本城都好難有運行，寧熱捧1.59倍客勝。
（Now 639、有線615及655台周三下午4時50分直播）
要數今季澳職令人最失望嘅球隊，肯定非中岸水手莫屬，佢哋開咧至今未贏過波之餘，聯賽仲只係攞得2分，聯賽榜排包尾，而且水手失球數字高達32球，防線可以話係如同虛設。
近6對賽水手不勝
上仗喺領先兩球優勢下，最終連失3粒以2比3輸番畀威靈頓鳳凰，該仗仲有後衞基爾盧尼斯領紅被逐，今場要坐波監冇份踢，進一步打擊球隊整體實力，形勢絕對唔樂觀。
墨爾本城雖然繼續雪藏想離隊嘅箭頭人物科拿路利，好彩魯克巴坦、拉利麥基爾等中場猛將有能力分擔入波重責，幫助球隊近5場聯賽收穫4勝1和，狀態冇得彈。加上墨爾本城近6次面對中岸水手取4勝2和，往績佔盡優勢，今場有力再下一城，客勝咪錯過。