篤定出線王牌避戰
今晚喺阿聯酋舉行嘅亞洲盃C組煞科戰，已經篤定出線的南韓與中國正面交鋒。南韓雖有王牌孫興民啱啱歸隊，但需時適應今仗未必披甲，攻力大減，而近2屆亞洲盃旺少交收，撞正中國王牌「武球王」武磊上陣成疑、今仗打和就首名出線嘅中國，唔慌多波入，中位數2.5球嘅細盤乃不二之選。
（Now 672周三晚9時30分直播）
原本今仗被視為兩大射手對決，不過南韓王牌孫興民在周一凌晨先為熱刺踢完對曼聯嘅聯賽，啱啱趕嚟阿聯酋同大軍會合，一來佢今季上陣頻密，二來路途遙遠又要適應時差，疲態畢露。既然「太極虎」頭2仗贏晒提早出線，今仗畀「老孫」抖吓亦屬人之常情，就算佢真係披甲，都未必即刻嚟料。事實上，「太極虎」雖然頭兩戰全勝，但都只係贏1比0，可見冇「老孫」情況下把握力奇差，冇乜霸氣。
孫興民武磊要休息
另一邊廂，近年被內地傳媒吹捧為「武球王」的武磊，上場踢出代表作，個人入兩球世界波帶領中國以3比0大勝菲律賓，不過有指佢首仗對吉爾吉斯整親膊頭，上仗只係打止痛針頂硬上，為免傷上加傷，有傳今仗會讓佢休息。兩軍頭2輪分組賽先後分別擊敗菲律賓及吉爾吉斯，同積6分，中國暫時得失球差較佳排榜首，如果兩軍同分會依次計算對賽成績及得失球差定排名，換句話講，如果今場和波，中國就可以壓過南韓取得首名出線資格，一定穩陣行先。
翻查紀錄，南韓近2屆亞洲盃8場法定時間之內保持不敗，於法定時間入8球僅失1球，有7場保持清白之身，防守力極強，以兩軍目前形勢，相信今場難有大手交易，捧中位數2.5球嘅細盤最好路。