美斯重返戰線實搶韁
今晚西甲巴塞隆拿同皇家馬德里又分途出擊，其中「1哥」巴塞主場迎戰伊巴。雖然啱啱周中西班牙盃輸波，但巴塞挾聯賽5連勝之勢，要贏伊巴冇難度，況且巴塞最鍾意速戰速決，隨時半場入多幾粒鎖定勝局，博半場大（1.5球）更明智。
（Now 632周一凌晨1時30分直播）
巴塞弗到漏油，好大程度係因為王牌美斯狀態勇達巔峰，呢位阿根廷球王近4場聯賽狂轟7粒，而且4場賽事均在上半場已取得入波，成為巴塞「閃電戰」嘅關鍵先生。儘管上周中西盃16強首回合爆冷作客1比2輸畀利雲特，但美斯同拍檔蘇亞雷斯都冇隨隊，可謂養精蓄銳等踢今場，相信一開波即搶韁嚟料。
伊巴作客出擊戰鬥力大打折扣，今季8場聯賽作客只得1勝，中場核心柏度李安又受傷缺陣，造訪魯營球場分分鐘半場都頂唔住。不過主勝及半場主勝冇肉食，反而巴塞近4場聯賽換邊前都攻入至少2球，轉捧1.7倍中位數1.5球嘅半場大更佳。
皇馬讓唔起貝迪斯
巴塞死對頭皇馬就會作客貝迪斯，上月於世冠盃封王嘅「銀河艦隊」，返回西甲後狀態持續低迷，暫列聯賽第5位，今場對手貝迪斯就落後4分排第6，可見皇馬冇太大優勢可言。皇馬上場聯賽唔單止爆冷輸畀皇家蘇斯達，嗰場仲有翼鋒盧卡斯華斯基斯領紅牌要坐波監，而且加里夫巴利、卻奧斯及門將泰拔高圖爾斯等主力都傷埋，人腳不整。貝迪斯主場出擊向來硬淨，近8場聯賽主場只係輸過1場咁大把，相反皇馬作客麻麻，近8場聯賽作客只贏過2仗，貝迪斯今場應該頂得住，主場出擊仲有得受讓咁筍，讓球主勝咪錯過。
（Now 632周一凌晨3時45分直播）