今午澳職獨腳戲，由布里斯班獅吼主場迎戰墨爾本勝利。獅吼仍處於無帥狀態，而且防線頻頻甩轆，近期不斷輸波搞到冇晒士氣，面對有弗爆射手托禾倫助陣嘅勝利，隨時大崩潰，勝利讓平半，上盤勁抵玩。
（Now 639、有線655及615台周二下午4時50分直播）
獅吼今季戰績曳爆，長期喺下游掙扎，就算上年年尾有主帥艾萊斯引咎辭職，仍未止住頹勢，看守領隊戴倫戴維斯以往只做過墨爾本勝利及澳洲U20助教，唔夠卡士擔大旗，而球隊至今仲未搵到新帥接手，成績持續插水，自上年11月起，近8場聯賽只得1和7負，狂失21粒，防線猶如豆腐渣，一篤即散。
本田缺陣都夠殺
勝利雖有日本中場本田圭佑因傷倦勤，但前瑞典國腳托禾倫喺澳職可謂超晒班，呢名射手近7場聯賽轟6球腳風頗順，而中場安東尼斯亦頻有入波及助攻，火力有保證。加上勝利開季後表現穩定，單計聯賽作客，近6場取得4勝1和1負，而且作客獅吼特醒，近2次都贏晒，包括在去年尾作客贏過獅吼4比2，今場再度北上去布里斯班，仲唔趁機踩多兩腳咩，上盤有買趁早。