火力唔夠 和波都掂
亞洲盃分組賽嚟到最後一輪，周二晚B組澳洲面對敘利亞。「袋鼠兵團」前線近期出現青黃不接嘅問題，攻力大不如前，加上呢場佢哋打和就可以出線，寧願以守代攻同敘利亞慢慢拉布，入波肯定唔慌多，中位數2.5球入球細唔好錯過。
（Now 671周二晚9時30分直播）
澳洲不嬲靠「彈弓人」卡希爾數胡，可惜自從呢為前愛華頓前鋒去年夏天踢完世盃宣布退出國家隊後，隊中接班人納博特、占士麥卡倫同羅比古斯等表現都麻麻交唔足貨，「袋鼠兵團」至今未揾到夠卡士嘅入球專家，今屆亞洲盃首戰面對約旦就再次啞火，最終0比1輸波收場，好彩上仗成功以3比0擊敗巴勒斯坦，呢場面對敘利亞和波都照樣可以出線，肯定會踢得更保守。
約旦可勝巴勒斯坦
同時間開波嘅仲有巴勒斯坦對約旦，呢場比賽馬會今日先會出賠率。小組兩戰全勝嘅約旦高踞B組榜首，已經提前鎖定16強席位，而且一球都未失過，表現夠硬淨，對付踢完兩場未入過波嘅巴勒斯坦絕對綽綽有餘，睇好約旦以全勝姿態強勢晉級。
（Now 672周二晚9時30分直播）