周四晚上亞洲盃分組賽繼續激戰連場，其中A組巴林硬撼泰國。巴林首戰雖然打和，不過面對東道主阿聯酋表現夠積極，敢放膽同對手鬥攻，對住首戰失利，為爭出線呢場肯定搶攻嘅泰國，隨時演入球騷，中位數2.5球大盤捧得過。
（Now 670周四晚7時直播）
泰國首戰慘敗畀印度，結果都算幾爆冷，不過球隊喺比賽中發揮其實唔差，只是上下半場嘅開局欠理想，上半場鄧達追和後未能乘勢追擊再入波，易邊後唔夠1分鐘又再失球，搞到球員信心受影響，打亂咗部署，賽後泰國足總隨即宣布辭退領隊拉耶華治，由助教旭亞泰頂上。好彩泰國本身實力唔曳，其中喺日職揾食嘅攻擊好手猜拿迪普桑格辛表現依然值得期待，呢場為盡快重回正軌，肯定搶攻，面對巴林隨時上演對攻戰。
敘利亞往績食住約旦
同日較遲時間開波嘅，仲有B組約旦火併敘利亞，約旦雖然首戰爆出今屆最大冷門擊敗衞冕嘅澳洲，不過對住實力絕對唔弱嘅敘利亞，未必搞得掂。加上敘利亞近5次同約旦交手取3勝1和1負，往績佔優，呢場有望再下一城，客勝博得過。
（Now 670周四晚9時30分直播）
印度強攻大起阿聯酋
最後到周五凌晨，A組東道主阿聯酋迎戰印度，印度上仗大勝泰國，向外界展示超強進攻火力，呢場隨時照辦煮碗再踢進攻足球，中位數2.5球入球大唔好錯過。
（Now 670周五凌晨零時直播）