吸取教訓唔敢輕敵
今晚英超獨腳戲，曼城喺主場迎戰狼隊，兩軍近況同樣不俗，不過「藍月亮」吸取早排連敗嘅教訓，面對遇強愈強嘅狼隊，相信唔敢輕舉妄動，加上狼隊近10場聯賽有9次開出3球或以下，中位數3.5球嘅入球細值得捧場。（Now 621周二凌晨4時直播）
曼城近期狀態回勇，豪取4連勝狂轟21粒，包括上周中英格蘭聯賽盃4強首回合狂數伯頓9比0，打番起信心，小將菲爾科頓更連續2場有士哥，賽前佢都話準備就緒踢今仗。
狼隊唔駁火玩突襲
「藍月亮」超班實力毋庸置疑，加上今戰於地頭出擊，贏波機會高唱入雲，不過能否大捷就係另一回事。畢竟喺聖誕快車初期接連輸畀水晶宮同李斯特城，若非喺月頭榜首大戰主場贏「1哥」利物浦2比1，聯賽爭標形勢會更加嚴峻，「長途賽」最講求穩定性，一場波贏1球攞3分，贏10球又係3分，吸取早前輕敵搞到2連敗嘅教訓，相信曼城都唔敢場場都狂攻。
另一邊廂，狼隊上周中喺英格蘭足總盃將利物浦踢出局，話就話對手出副選，但呢隻狼唔講得笑，唔單止近7場聯賽取得4勝1和2負，而且專揀強隊嚟咬，今季聯賽7鬥Big 6球隊，錄得2勝3和2負，包括上年年尾反勝熱刺3比1，曼城想贏絕不能大意。狼隊近期傾向先求不失，再伺機突襲求勝，絕少與對手駁火，近10場聯賽有9次開3球或以下，今仗作客唔會冒進，加上近3次交手，兩隊夾埋入得4粒咁大把，博3.5球嘅入球細好路。