英超頭場爆發倫敦打吡，阿仙奴造訪「錘仔幫」韋斯咸。阿仙奴捱過傷兵潮後明顯有起色，箭頭拿卡錫迪亦弗番，遇上由一眾「兵工廠棄將」組成嘅「錘仔幫」，挾近年對賽格食格之勢可反客為主，一於捧客勝。
（Now 621周六晚8時30分直播）
阿仙奴早排堅多傷兵搞到冧檔，包括作客以1比5倒輸畀利物浦，全部走晒樣，好彩近期傷兵情況有所改善，尤其係比利連、蒙利爾、梅斯達菲等防線主力已經復操，中場奧斯爾亦好番，今場可望復出上陣，有助改善攻防。箭頭拿卡錫迪隨住上場聯賽對富咸終於取得士哥，總算重拾信心，而且有佢開路及拉邊，可以為另一射手奧巴美揚製造更多射門空間，令進攻更有效率。阿仙奴近2場先後於聯賽以4比1大勝富咸，以及英足盃3比0淨勝黑池晉級，明顯重上正軌。
「私房菜」韋斯咸跌晒Watt
另一邊廂，位處聯賽榜中游嘅韋斯咸，近4場聯賽只得1勝1和2負，近況有回落迹象。雖然「錘仔幫」近日獲得拿斯尼加盟，不過呢名前法國國腳，與盧卡斯佩雷斯、法比安斯基咁啱都係阿仙奴棄將，點同正牌「兵工廠」撼呀。連同好番冇耐嘅射手阿拿奧杜域喺上場英足盃再度傷出，今戰上陣成疑，即使坐擁主場之利，想搏亦有心無力。加上近6次交手，阿仙奴取得5勝1和不敗佳績，明顯食住「錘仔幫」，客勝有計。