泰國細頂阿聯酋保出線
亞洲盃A組最後一輪2場齊齊上演，呢組4隊都有機會出線，牌面上梗係只得1分包尾嘅巴林最差，所以論鬥志一定係4隊之中最好，巴林今晚最後一場鬥印度，最近4次交手巴林全部贏晒，心理上有優勢，今場個客Ｗ只得1.67倍擺明有計，有買趁早。
（Now671及Fox+周二凌晨零時直播）
印度近4交鋒輸晒
巴林分組賽頭兩場表現其實唔差，首仗對東道主阿聯酋，大部分時間領先之下，完場前2分鐘因一個問題12碼慘遭逼和，次仗對泰國，成場波控球率近六成，有多個黃金機會，可惜未能演化成入波，反被泰國爆冷贏1比0，搞到依家只得1分嘅困境。
印度近年成績突飛猛進，但始終大賽經驗欠奉，首戰贏泰國後，次仗對阿聯酋就露出真面目淨吞2蛋，睇番巴林可以同阿聯酋打和，而且近績食住印度，今場仲要抱住必勝心態出擊，值得投以信心一票。
同時間開波嘅阿聯酋對泰國，由於雙方分別有4分同3分，和波對雙方有好處，尤其泰國面對主辦國更加唔需要冒進，死守博1分好過，相信今場都係少交收，捧2.5球入球細。
（Now670及Fox+周二凌晨零時直播）