近10季英超能喺聖誕新年快車後排榜首，就有7隊由頭贏到尾最終封王，堅好腳頭，但凡事都有例外，阿仙奴（2次）及利物浦則成為剩番嗰3季嘅不幸者。
「肥賓」輪換制招惡果
先講利物浦，佢哋喺2008-09年度球季初段即帶出，當時主帥賓尼迪斯最鍾意玩輪換制，呢招係可確保球員整季嘅體能儲備，「肥賓」亦唔敢亂郁謝拉特、費蘭度托利斯等主力，但紅軍本身板櫈深度唔夠，為輪換而輪換，將過別弗爆主力收起，而後備兵又唔夠班，直接影響成績，尤其係對韋根、史篤城、侯城、富咸等弱旅失分成關鍵。好衰唔衰，「肥賓」季中忽然同費格遜打心理戰，拿出一疊「罪狀」稱曼聯有被偏幫之嫌，反而激發紅魔從後趕上。
至於阿仙奴喺2013-14年、2015-16年兩度失諸交臂，查實係有迹可尋。兵工廠喺老帥雲格帶領下，執教後期每季都有個循環：季初狀態特醒、之後傷兵愈來愈多、踏入2月聯賽及歐聯多線作戰下崩潰、最終只能保住前4。最致命係黑色2月，阿仙奴例牌先於歐聯16強出局，信心受挫影響埋聯賽，喺2及3月嘅聯賽踢到失晒魂，正係「雲爺爺」不自量力，個個盃都想捧，落得「竹籃打水一場空」嘅結局。而嗰兩季阿仙奴，喺中後段傷兵成籮，亦係甩轆嘅關鍵。