次循環首戰即遇剋星
經過接近1個月歇冬休戰後，德甲今晚重開，賀芬咸主場同拜仁慕尼黑揭開次循環戰幔，班霸拜仁近7年來首次未能以榜首位置展開次循環賽事，當然希望打響今年頭炮，可惜首仗即遇上剋星，加上陣容不整前線啞火，預期只能先做好防務再穩中求勝，今場大細中位數開到3.5球太多，黑柴推介細盤。
（Now 670及Fox+周六凌晨3時30分直播）
開季甩轆嘅拜仁喺歇冬前總算穩定番，近5場聯賽全勝，不過仍然落後榜首多蒙特6分，照道理次循環必須加強攻力追分，不過會方已決定留番啲錢季後至增兵，實力上並冇提升。
教練尼高高華係實幹型，但欠缺執教大球會經驗，佢認為去年底5連勝主因係防線表現大有進步，所以大軍喺卡塔爾冬訓期間，仍然以練習防守為主，當時已經畀德國傳媒甚至個別拜仁球員質疑，歇冬後佢哋喺德國電訊盃雖然捧盃，但對杜塞爾多夫同慕遜加柏兩場賽事都無法取得入球，只係靠互射12碼勝出，箭頭羅拔利雲度夫斯基腳風欠順，一對高質翼鋒洛賓同列貝利又齊齊因傷缺陣，球隊目前火力嚴重不足，今晚作客要撕破剋星防線絕唔容易。
賀芬咸主場往績頂得住
賀芬咸目前只排聯賽榜第7位，但球隊表現其實相當唔錯，個別主力包括中場迪米亞巴爾同左閘尼高舒侯斯更被傳媒評超高分，未能殺入前列主因係受分心歐聯影響。雖然球隊喺歐聯出局後顯示野心不足，歇冬期轉會窗有出冇入，一口氣借走5名邊緣球員減省開支，不過對正選陣容影響唔大，眾將歇冬期抖足預期下半季初段表現唔會走樣。何況賀芬咸主場打拜仁特別醒神，近兩次主場對賽分別贏1比0同2比0，全勝冇失波而且全開細盤，今晚仍然有信心頂住強敵來犯，預期入波唔會多。