狀態大勇嘅曼聯，今晚英超喺主場迎戰「海鷗」白禮頓。曼聯自看守領隊「蘇B」蘇斯克查上任後，連贏6場，保羅普巴等主力信心返晒嚟，面對作客麻麻嘅「海鷗」，有望締造7連勝，直取讓球主勝。
（Now 622周六晚11時直播）
「海鷗」作客濕滯
同因過於保守、戰績唔掂而被炒嘅摩連奴唔同，曼聯搵來進攻大過天嘅蘇斯克查救亡後，成隊波即時醒晒，連同上場靠迪基亞多番神救、以1比0勇挫熱刺在內，「蘇B」領軍後豪取6連勝，令佢成為紅魔史上首位頭6場領軍全勝嘅主帥。其中王牌保羅普巴全面回勇，喺「蘇B」接手後轟入4球及交出4次助攻，另一主將拉舒福特亦大爆發，近期力壓狀態低沉嘅盧卡古擔正，近5場聯賽共入4球，依家曼聯已回復「魔性」，甫開賽即搶韁由頭攻到尾，其中5場喺上半場已取得領先優勢，魔性澎湃。
「海鷗」白禮頓雖然硬淨，但作客成績遠遜主場，開季至今11場聯賽作客，只得2勝2和7負，其中8場更係先失波嗰隊，經常陷於被動，客場又點會有好成績呢。紅魔咁鍾意先發制人，挾近期強勢迎戰客場差勁嘅白禮頓，有權大勝一場締造7連捷，讓球主勝咪錯過。