鬥Big6失波多
今晚英超壓軸上演倫敦打吡戰，由第5位嘅阿仙奴主場迎戰第4位嘅車路士，由於近期曼聯復甦，變相令前4爭持更激烈。論上半季表現，車仔確實比兵工廠好，但又估唔到作客要讓平半咁惡，樂比建議改向中位數2.5/3球大盤埋手，事關阿仙奴今季防線甩漏甚多，開大易過借火！
（Now 621周日凌晨1時30分直播）
阿仙奴今季改由艾美利領軍，進攻無疑較上季銳利，目前平均每場入球為2.09球，較上季1.95球略為優勝，但失球數字卻由1.34增至1.45球，其中Big6對賽情況更嚴重，1勝2和4負成績固然差，7場波失咗17球之多，今場隨時又好似首循環輸2比3咁上演入球騷。
車路士反擊掂「夏神」弗
事實上，阿仙奴今季22場聯賽當中，僅得3場保持清白之身，其實艾美利都知阿仙奴現時問題所在，所以經常採用三中堅踢法，希望可以利用人數嘅優勢穩固防線，但兩閘經常有上冇落，中場球員又唔夠硬朗，都係阿仙奴防線經常崩潰嘅原因，所以佢都想物色新後衞加盟，可惜遠水不能救近火！
阿仙奴今季另一弱點係非常慢熱，22場聯賽僅得2場係半場領先，另外32個失球當中，有20個失球來自上半場，可見阿仙奴開局係幾咁不濟，今場亦不妨向半場大埋手。
另一邊廂，車路士今季進攻火力唔算強勁，但對Big6就好多波入，首循環5次對Big6球隊入咗9球，主要原因係車仔防守反擊相當有威脅，「夏神」夏薩特今季已貢獻咗10個入球同10次助攻，即使兩名前鋒基奧特同艾華路莫拉達啞火，其他中場球員都經常後上取得入球，而希古恩即將加盟嘅消息，亦可望刺激到進攻球員嘅表現。