周六晚上西甲焦點大戰，皇家馬德里將會主場強戰3哥西維爾。季初曾經陷入低潮嘅皇馬，自阿根廷主帥蘇拿利接手後，狀態漸入佳境，尤其巴西新兵雲尼斯奧斯祖利亞靠出色表現，急速上位，呢場面對走勢下滑嘅西維爾隨時再有發揮機會，帶領「銀河艦隊」大勝對手，皇馬讓半一上盤值博。
（ViuTv 99及Now 632周六晚上11時15分直播）
皇馬雖然聯賽暫時屈居第4，更畀死敵巴塞隆拿拋離成10分，不過未言放棄，近期球隊狀態回勇，繼西盃16強首回合3比0輕取雷加利斯，兩回合計3比1成功晉級，上場聯賽再以2比1擊敗貝迪斯，其中年僅18歲嘅鋒將雲尼斯奧斯祖利亞表現搶眼，有望成為繼「大哨」朗拿度同羅賓奴等巴西前輩之後，又一位喺「銀河艦隊」站穩陣腳嘅森巴兵。加上防線老大哥沙治奧拉莫斯，同繼續取代傷兵泰拔高圖爾斯嘅門神基羅拿華斯把關，兩人拍檔多年合作無間，令皇馬可以保持攻守平衡。
主場炒慣西維爾
另一邊廂，賽前以對賽成績優勢壓過皇馬排名第3嘅西維爾，啱啱喺聯賽同西盃連續兩次畀畢爾包擊敗，防線明顯欠穩，加上中場大將洛基美沙累積黃牌要坐波監，整體實力肯定大打折扣。況且皇馬近9次主場迎戰西維爾贏晒，其中8次贏2球或以上，格食格味濃，呢場冇理由唔追皇馬上盤。