至於早場奧格斯堡迎戰杜塞爾多夫，我哋東網都安排咗英語旁述直播，呢場波牌面睇戲碼唔算勁，不過雙方都聲言擺大頭搶攻博攞晒3分，兩軍都有卡士唔錯嘅攻擊手，今場推介中位數2.5球大盤。
（on.cc東網周六晚10時30分直播）
兩軍分列聯賽榜下游嘅14同15位，奧格斯堡開季成績唔曳，不過到咗去年底因為傷兵問題嚴重開始跌Watt，最近8場聯賽3和5負未贏過，排名急劇插水，好在經過歇冬期傷兵問題得到一定改善，雖然守將史迪菲尼迪斯、中場卡奧比同具滋哲繼續養傷同去咗踢亞洲盃，防中蘭尼基迪拉停賽，但前線陣容復整，王牌射手艾費特芬保加臣得到基哥列舒治同安達夏恩支援，主場遇弱旅誓全力搶攻，有決心重返勝軌。
杜基斯治加操博開齋
原本被視為降班膽嘅杜塞爾多夫，上半季成為神奇球隊，歇冬前3連勝震驚德甲，攻擊手盧克巴基奧同賓尼圖拉文更輪流爆發，可惜歇冬期爆出主席縮骨唔肯同教練芬基續約風波，搞到球迷起革命，依家球會高層雖然同芬基傾掂數，話如果成功護級佢將會自動續約多一季，但球隊形象同士氣多少都受到影響。
不過，季前球隊嘅最貴收購杜基斯治喺歇冬期自我加操，表現大受好評，呢位上季德乙神射手，今季上半季喺德甲竟然未開到齋，認真尷尬，會方同佢都聲言要喺下半季重拾射門鞋，今晚場波大家一於睇實佢啦！