德甲重頭戲，4哥RB萊比錫主場挑戰1哥多蒙特，兩軍係德甲歇冬期最揼本球隊，都有挑戰冠軍野心，相比之下多蒙特整體實力稍佔上風，但萊比錫主場硬淨今季未輸過，今晚碰頭激戰難免，咁緊湊嘅賽事，投注首選係有3.45倍嘅和波。
（on.cc東網周日凌晨1時30分直播）
兩軍今仗都陣容不整，萊比錫前鋒阿文度布馬同貴價新援中場海達拉仍然養緊傷，中場大腦科斯貝治重傷初愈已復操，但距離復出仲需要一段時間，另一中場伊辛卡停賽，新援中場泰拿阿當斯仍需要時間融入球隊暫列後備，陣容唔算好完整，不過歇冬期備戰相當積極，教練蘭歷克刻意加強體能練，球隊首循環主場9戰取得7勝2和不敗佳績，今晚蓄銳有信心挑戰強敵。
冷敲12倍半全場「主和」
榜首多蒙特實力稍勝一籌，不過陣容比萊比錫更殘，4名主力中堅都唔可以擔正，當中文路爾艾簡治同薩加度因傷缺陣，艾度迪亞路剛傷愈未弗最多只能先任後備，新加盟嘅阿根廷中堅李安納度巴拿迪又要代表阿根廷U20踢美青盃，領隊法夫爾焗住用防守中場祖利安韋高客串中堅，防線有隱憂。佢哋今仗會繼續用馬里奧葛斯做單箭頭，高效射手柏高艾卡沙先任後備，翻查佢哋今季作出呢個安排，已經試過3次半場冇料到（和波或落後），到下半場換入艾卡沙至反勝，當中以主場反勝拜仁最經典，既然今仗和波味濃，黑柴仲會小注有12倍好分頭嘅半全場「主和」，博艾卡沙做多次救世主。