足球教練、喺英國則叫領隊嘅呢項職業，愈嚟愈難做，近16年來喺歐洲叱咤風雲嘅主帥亦所剩無幾。曾經炙手可熱嘅「寸王」摩連奴，今季畀曼聯炒魷，同佢堪稱一時瑜亮嘅賓尼迪斯，如今淪為執教護級分子紐卡素，3年前締造李城奪冠神話嘅雲尼亞里，亦喺富咸苦苦掙扎，實在難撈。
回帶返去2003至04年，摩連奴率領弱小嘅波圖連奪歐洲足協盃（歐霸前身）及歐聯，之後代替雲尼亞里入主車路士兼稱霸英超；2004至05年，輪到賓尼迪斯複製此神迹，並於執教利物浦期間與「寸王」多番惡鬥，兩人當時40歲左右，同樣注重細節及偏重防守，引領歐洲戰術潮流。再老一輩嘅雲尼亞里，成就唔及前兩者，但遊歷英超、西甲、意甲及法甲等幾大聯賽，經驗豐富。
不過，佢哋從未好似費格遜、雲格般長期執教一隊，何解呢？一來現時嘅球隊高層，冇以前咁有耐性，給予主帥3至5年慢慢執好隊波，隨時3個月冇成績即炒；二來每支球隊都有自己文化，主帥必須先了解才可融入，例如曼聯一向流着進攻血液，而且重視青訓，但自費爵爺退休後，接手嘅莫耶斯、尹戈爾及摩連奴都忽視呢兩方面，其中「寸王」更不斷買大牌及防守大過天，與紅魔傳統南轅北轍，又點會做得長久呢！反而經驗較淺、但明白呢點嘅蘇斯克查豪取6連勝，由此可見一斑。與紅魔相反，阿仙奴近期氣勢一路向下，今晚喺英超倫敦打吡主場對車路士，凶多吉少。