「龍之殺手」阿迪沙格拉頌壓陣
亞洲盃16強開打，今晚就有泰國火併中國。國足今屆開局眼前一亮，尤其係前鋒武磊表現搶眼，可惜佢有傷在身，面對有「龍之殺手」壓陣嘅泰國，國足好難過到骨，泰國讓球主勝好路。
(Now 671周日晚上10時直播)
亞洲盃賽前，中國隊連場閉門熱身賽表現欠佳，就連一班不嬲鍾意將中國隊睇高一線嘅國足球迷都冇眼睇，搞到老帥納比愁眉深鎖。好在國足今次大賽開局夠爭氣，連贏吉爾吉斯同菲律賓，即使尾輪對南韓輸波都能以次名出線。不過今屆賽事表現搶眼嘅前鋒武磊，左臂傷勢唔多樂觀，呢場就算頂硬上，表現都難有保證。
另邊廂嘅泰國，喺確定16強對中國後，教練團已經放風話贏國足「其實唔難」！佢哋之所以咁有自信，原因係佢哋唔只有鄧達、猜拿迪普桑格辛呢啲猛將，仲有一個綽號「龍之殺手」嘅27歲前鋒阿迪沙格拉頌，佢喺2013年6月15日泰國作客友賽中國場波，第一次披上國家隊球衣就入咗兩球，幫助「戰象」爆冷大勝5比1。跟手2014年2月25日，2014年亞冠盃分組賽武里南聯客場出戰山東魯能，佢又喺補時階段入波，逼和主隊。然後2014年仁川亞運足球16強中泰大戰，阿迪沙格拉頌又起孖，助泰國贏2比0淘汰國足，中國球隊真係見親佢都頭痛。
猜拿迪普桑格辛■■要藉機搵新東家
對於效力日職北海道札幌岡薩多嘅中場猜拿迪普桑格辛嚟講，呢場16強仲有另一層意義：「日職、韓職、澳職以至其他國家，都有球探喺度，只要泰國球員踢得出色，亞洲盃後就有機會去其他亞洲聯賽歷練。」況且，呢場係主力鄧達第99場國家隊賽事，如果順利晉級就達到100場嘅里程碑，為名為利，泰國定必搏到盡，「讓球主客和」中國仲要讓波，泰國讓球主勝有買趁早！