亞洲盃16強激戰連場，其中周二晚上南韓將會火併巴林。「太極虎」雖然有頭號球星孫興民壓陣，但係球隊打法唔算進取，呢場面對以死守陣應戰嘅巴林，入波唔慌會多，寧願捧中位數2.5球入球細好過。
（Now 671周二晚9時直播）
貴為亞洲勁旅，南韓上一次捧起亞洲盃已經要數到去1960年，上屆仲喺決賽加時輸畀澳洲飲恨而回，今屆球隊捲土重開強陣出擊，雖然頭兩場主力前鋒孫興民都冇份踢，不過都無阻「太極虎」搶得好成績，最終分組賽3戰贏晒，而且未失過1球，以全勝姿態晉級16強。值得留意，南韓今屆3場分組賽入得4球，有人可能話佢哋表現欠缺霸氣，不過呢種穩打穩紮嘅踢法，其實應付淘汰賽絕對啱使，球隊近9場亞洲盃法定時間全開2球或以下，呢場面對攻力唔算出色嘅巴林，南韓可以照辦煮碗，中位數2.5球入球細好路。
卡塔爾追擊伊拉克
去到周三凌晨，卡塔爾將會硬撼伊拉克。卡塔爾今屆表現超班，分組賽3戰全勝狂轟10球，仲未失過1球，其中就包括以6比0血洗北韓，同上仗以2比0擊敗傳統勁旅沙特阿拉伯。而發揮最出色嘅，肯定要數攻擊手阿蒙斯阿里，呢位22歲新星3場分組賽都有波入，已經個人斬獲7球，加上球隊近4次面對伊拉克取3勝1負往績佔優，呢場有力乘勢追擊，讓平半上盤值博。
（Now 671周三凌晨零時直播）