國足慢熱唔集中
亞洲盃8強今晚開打，國足於尾場挑戰「亞洲1哥」伊朗。國足今屆比賽入局慢，4場比賽有3次半場落後，就算曾經試過反勝吉爾吉斯及泰國，但今次對手換上攻守兼備嘅伊朗，國足一旦再次先失守，想收復失地恐怕唔容易，今場伊朗客Ｗ僅得1.36倍冇肉食，建議捧1.93倍半場客勝。
（Now 671周五凌晨零時直播）
國足今屆雖已達到主教練納比賽前目標進身8強，不過整體發揮唔算突出，分組賽對吉爾吉斯及上圈16強對泰國，國足都係半場落後，然後靠下半場入波反勝對手，比賽初段球員明顯唔夠集中，今次對手換上現時亞洲區世界排名最高嘅伊朗，如果再犯同樣錯誤，想反撲難度更高。
伊朗今屆賽事踢出王者風範，除咗4戰保持0失球，外流歐洲嘅王牌球星阿斯蒙及查漢巴列殊皆已開齋，表現攻守兼備，被視為奪標熱門之一絕對合理。伊朗除咗最後一輪分組賽、喺穩奪16強資格下打和伊拉克0比0，其餘3戰皆能喺換邊前打破悶局，由頭贏到尾，今仗有力喺慢熱嘅國足身上搶得先機，1.93倍半場客勝博得過。
日本可小勝越南
至於另一場較早時間開波嘅8強，由應屆東南亞錦標賽冠軍越南挑戰4屆亞洲盃盟主日本。越南今屆頭兩場雖然先後輸畀伊朗、伊拉克，但仍然憑最後一仗擊敗也門，以最佳第3名出線，上仗16強更被睇淡下憑互射12碼淘汰約旦，成績超越預期，今場面對爭標熱門日本可以講冇任何心理包袱。
日本今屆非常着重防守，以至控球率創出自2002年世盃以來267場國際賽嘅新低。以上仗對沙特阿拉伯為例，平均數一度低至不足24%，對講求控傳嘅「藍武士」而言係極度不利。所以日本迄今4戰全勝，但4場皆僅贏1球差距，防線亦唔算太穩健，前鋒武藤嘉紀累積黃牌今場停賽，另一射手大迫勇也剛傷愈，只不過用佢定改用北川航也，要視乎兩人賽前狀態，預計日本憑質素可小勝，不妨冷敲讓球和。
（Now 671周四晚9時直播）