英格蘭聯賽盃4強次回合，車路士主場再鬥熱刺，熱刺首回合雖然領先1比0，但今場要殘陣作客，「4大天王」哈利卡尼同迪利阿里受傷缺陣，孫興民出戰亞洲盃未歸隊，只係得番基斯甸艾歷臣撐住，實力降晒呢，加上熱刺近5次作客「藍橋」僅得1勝1和3負，車路士仲唔趁機發難翻盤，主勝有1.56倍咪錯過。（周五凌晨3時45分開賽）
今季熱刺喺聯賽加盃賽合共射入72球，當中哈利卡尼20球、孫興民12球、迪利阿里亦有7球，3人合共射39球，佔咗熱刺入波超過一半，依家3人同時缺陣，話影響唔大嗰個都呃你，淨係睇上場英超對富咸賽後訪問，熱刺領隊普捷天奴講迪利阿里傷勢時愁眉苦臉個樣，你就知有幾大鑊。
今季主場砌Big 6有計
熱刺正選中前場球員個個都擁有一線實力，但班替補就唔同講法，洛蘭迪、拉美拿只能夠講係二線球員，今季為熱刺入過8球嘅巴西中場盧卡斯莫拉亦膝頭受傷未知踢唔踢得，今場普捷天奴只能夠打防反，弊在呢樣並唔係熱刺最耍家嘅踢法，隨時自亂陣腳。
車路士首回合作客輸0比1，想翻盤打入決賽今場非勝不可，一眾主力包括夏薩特、佐真奴費路、尼高路簡迪等喺首回合皆正選上陣，為收復失地，今場肯定強陣出擊。車仔上場聯賽作客雖不敵阿仙奴0比2，但回師主場又係另一回事，皆因車仔今季4次迎戰Big 6球隊保持不敗，而且4場車仔都係先開紀錄嗰隊，加上主場鬥熱刺往績靚，主勝必捧。