今晚西盃8強首回合，皇家馬德里先喺主場迎戰基羅納。「銀河艦隊」有卻奧斯及馬高斯洛蘭迪等人復操，今仗好大機會披甲，面對沉到爆嘅基羅納，為盡早鎖定出線，勢必藉地利大炒一場，直取讓球主勝。
（周五凌晨4時30分開賽）
基羅納近8仗不勝
皇馬雖然上仗聯賽擊敗勁敵西維爾升做「3哥」，但查實近期表現飄忽，尤其係西盃16強次回合以0比1輸畀雷加利斯，就算兩回合計贏3比1晉級，依然畀人插到開花。當然主帥蘇拿利亦有苦自己知，因為卻奧斯、馬高斯洛蘭迪、加里夫巴利、馬高阿辛斯奧及基羅拿華斯等全部傷晒，好彩前兩者已經復操，今仗大有可能復出救駕，總算令皇馬中前場人腳齊整番啲。
基羅納同樣面對傷兵滿營嘅苦況，阿地賓尼迪斯、柏德列羅拔士要抖到下個月，莫積卡更提早收咧，搞到戰績大跌Watt，連埋盃賽，佢哋近8仗未贏過，上次贏波已經係上月頭嘅事，曳到冇朋友。
加上雙方近兩次交鋒，皇馬分別大炒4比1及6比3，贏親都大大鑊，信心自然倍增。基於西盃賽程咁密，「銀河艦隊」梗係想趁主場狂數對手，早早擴大領先優勢，次回合就唔使搏到咁盡，今場讓球主勝有計。