周五下午澳職獨腳戲，兩隊下游分子布里斯班獅吼同西悉尼流浪者將會正面交鋒。主隊獅吼同西悉流後防表現都麻麻，為擺脫近期頹勢，兩軍隨時大演對攻戰，中位數3.5球入球大唔好錯過。（Now 639、有線615及655台周五下午4時50分直播）
先講講主場出擊嘅獅吼，球隊今季15場聯賽只係贏得1場，唯一勝仗要數番去上年11月以2比1擊敗墨爾本城，之後10場聯賽未贏過，仲輸咗8場，就算前主帥艾萊斯上月底離隊，搵嚟戴倫戴維斯做看守領隊，但係球隊表現未見起色。獅吼近3場聯賽主場唔止失晒9分，仲失咗13球兼全開5球或以上，後防如同虛設，呢場隨時再輸多幾粒。
雙方防線中門大開
不過要數近期澳職最頹球隊，肯定非西悉流莫屬，佢哋聯賽已經慘吞6連敗，狀態仲衰過獅吼，上仗作客就同墨爾本城打成3比4，最終輸波收場，可見西悉流防線漏洞都好明顯，好彩佢哋主力前鋒奧利奧爾尼亞拿傷愈復出，呢場與其屯兵後防，不過以攻代守入多幾球仲實際，中位數3.5球大盤值博。