狀態士氣天 與地
英超本周末休戰，改為上演英格蘭足總盃第4圈，周六凌晨重頭戲，兵工廠阿仙奴主場迎戰紅魔鬼曼聯；紅魔自從蘇斯克查上任後，連贏7場氣勢如虹；兵工廠後防球員接連行衰運，加上近年鬥紅魔輸多贏少，平手盤撐紅魔鬼。
（周六凌晨3時55分開賽，馬會網上文字直播）
紅魔鬼自從由「蘇B」蘇斯克查接任看守領隊後，聯賽加盃賽已連贏7場，成為球會史上成績最好嘅新任主帥，佢嘅教波風格及主攻戰術都贏得民心，「坐正」呼聲愈來愈高，「蘇B」之前亦講過好樂意長期留效，如果佢想增加自己嘅「談判」籌碼，除要爭入聯賽前4名，英足盃都係重點出擊項目。
「蘇B」能將紅魔撥亂反正，最大原因係改善咗領隊同球員之間嘅關係，除咗保羅普巴及拉舒福特成功「翻生」，被貶為後備嘅盧卡古亦冇公開表示不滿，反而每次有機會落場都特別搏命，用行動爭取表現，唔好忘記紅魔後備席上仲有阿歷斯山齊士，如果連佢都交到功課，紅魔下半季嘅表現真係唔可以忽視。
兵工廠今季喺聯賽主場雖然贏過熱刺及車路士，不過總計各項賽事8次鬥Big6只得2勝2和4負，勝出率不足3成，而且佢哋今季一共踢咗33場比賽，後防加埋失咗38球，平均每場失1球或以上，演出絕對唔穩健。右閘比利連上場觸傷左膝韌帶，連同早前受傷嘅洛賀丁齊齊提早收咧，一旦右閘改用老將列治史迪拿或贊堅臣都畀唔到人信心。
近6次交手阿仙奴僅1勝
睇埋往績，兵工廠近6次交手只贏過紅魔1次，當時紅魔因要專心應付歐霸盃4強對切爾達，喺16/17年度聯賽次循環作客淨吞2蛋，其餘5次紅魔打真軍一共攞到3勝2和，以現時紅魔勇態作客酋長球場，基本上係坐和望贏，平手盤揀紅魔。