淘汰賽階段鬥謹慎
今晚亞洲盃續有2場8強上演，頭場係「太極虎」南韓火併卡塔爾。南韓貫徹穩中求勝嘅策略，連王牌孫興民都未開齋，撞正防守固若金湯、今屆仍保持清白之身嘅卡塔爾，大家鬥穩陣下唔慌多波入，捧2.5球嘅細盤最划算。
（Now 671、有線652及612台周五晚9時直播）
南韓喺上場16強一時大意，法定時間畀巴林逼和1比1，亦係佢哋今屆首次失波，好彩加時靠後備入替嘅金珍洙建奇功，先險勝2比1晉級。縱然「太極虎」有熱刺射手孫興民助陣，但近2屆都秉持穩打穩紮嘅風格，近10場亞洲盃法定時間取得7勝3和未輸過，其中8場保持不失球，總入球全開2球或以下。事實王牌孫興民因為出現疲態，今屆2次上陣都仲食緊白果，連日嚟都有專人幫佢做放鬆治療，加上中場核心奇誠庸喺首場受傷後已返英治療，未知喺餘下亞洲盃能否披甲，進攻受削弱，惟有踢得更保守。
卡塔爾今屆4戰保不失
另一邊廂，卡塔爾今屆4戰贏晒，包括16強以1比0擊敗伊拉克，除咗已攻入7粒、排緊射手榜榜首嘅阿莫斯阿里堅Sharp醒外，其穩健嘅防守同樣重要，佢哋與伊朗同為今屆仍保持清白之身嘅球隊，可見一斑。況且踏入淘汰賽階段，唔想先失波陷於被動，必定踢得小心謹慎，大家都唔敢亂攻，入球細乃不二之選。