至於今晚亞洲盃8強壓軸尾場，由東道主阿聯酋硬撼上屆盟主澳洲。阿聯酋今屆進攻唔多掂檔，唔想重蹈上屆4強交手輸波嘅覆轍，今場唔敢冒進，適逢跌晒Watt嘅「袋鼠國」，初段隨時玩拉布，半場和值博。
（Now 671、有線652及612台周六凌晨零時直播）
雙方啞火勢玩拉布
翻查紀錄，雙方喺上屆4強交過手，當時阿聯酋以0比2輸畀東道主澳洲，今場掉轉輪到阿聯酋做主辦國，始終上屆碰頭落敗，難免有戒心，今場必定小心為上。而且頭號球星奧馬鴨都拉文因傷落選，對阿聯酋進攻打擊極大，連一向進攻大過天嘅主帥沙哲朗尼都冇晒計，雖然殺入8強，但今屆4場法定時間僅得1勝3和，包括上場16強幾經辛苦，喺加時先險勝弱旅吉爾吉斯3比2，表現令人失望，其中3場開半場和，進攻唔掂惟有踢得保守啲。
衞冕嘅澳洲今屆跌晒Watt，分組賽首輪爆大冷輸畀約旦，之後連勝2場出線，但喺16強面對實力強啲嘅烏茲別克，法定時間連加時均互交白卷，最終僅靠互射12碼先淘汰對手，幸運成分居多。喺一代射手卡希爾退出國家隊、中場阿倫穆爾因傷落選後，「袋鼠國」嘅進攻板斧真係唔多，面對求穩嘅阿聯酋，初段大家鬥玩拉布唔奇，半場和更好路。