巴登符騰堡州打吡，弗賴堡主場迎戰賀芬咸，安排英語旁述。兩軍賽前因為不平等借將條款問題鬧得唔多愉快，今場對決肯定打甩髀，賀芬咸質態都稍勝一籌，作客小讓平半，上盤可捧。
（on.cc東網周六晚10時30分直播）
賀芬咸近年基於班主霍普要求球隊自負盈虧，唔似得幾年前咁大花筒，今屆喺歐聯出局後，會方有感只係應付本土賽，球隊兵源略嫌臃腫，於是喺歇冬期一口氣將5名邊緣球員外借，除巴西小將菲臘比皮利斯借番巴西畀彭美拉斯外，另外4將分別借畀4間德甲友會，包括門將基哥高保（奧格斯堡）、後衞阿克普古馬（漢諾威）、中場史堤芬蘇巴（史特加），同埋將啱啱喺兩個月前首次代表意大利國家隊出賽嘅中場基科借畀弗賴堡，原本各取所需大家開心，點知近日弗賴堡至發現借用條款唔公平而提出抗議。
弗賴堡借將遇不公平對待
原來賀芬咸借出呢批球員，只有同州嘅弗賴堡受到規限，基科喺今季內對賀芬咸嘅比賽唔可以倒戈上陣，但其餘借出嘅球員就冇呢個限制，弗賴堡得悉後向賀芬咸提出應該畀基科喺今晚上陣，不過遭賀芬咸拒絕，佢哋話其餘3支獲借將嘅德甲球隊都係急需護級嘅弱旅，但弗賴堡實力比佢哋高，今場又係打吡戰，何況合約白紙黑字訂明條款，決定維持唔畀基科喺今仗上陣。
賀芬咸夫添勝算較高
弗賴堡喺咁嘅情況下當然唔高興，今晚打吡戰預期會畀多兩錢肉緊，不過佢哋歇冬後首戰遭法蘭克福打爆，狀態麻麻，至於賀芬咸上仗雖然輸畀班霸拜仁，但下半場狂攻極具威脅，若非紐亞神救佢哋未必會輸，今晚夫添出擊，有信心攞到新年第1場勝仗。