快車將至各有保留
今晚英足盃第4圈賽事，英超「2哥」曼城主場迎戰般尼。雖然兩軍聯賽排名差幾條街，但因為嚟緊周中聯賽加開快車，為免增添傷兵，隨時好似啱啱英聯盃咁出副選迎敵，見好即收唔慌多波入，3.5球嘅細盤仲好路。（周六晚11時開賽）
曼城依家4線發展，聯賽、歐聯、英足盃都有爭標機會，啱啱又殺入英聯盃決賽，賽程堅密，查實佢哋板櫈深度唔係咁深，若果唔覺意有人受傷都幾麻煩，淨係睇前鋒只得阿古路同加比爾捷西斯輪換就知喇，難怪主帥哥迪奧拿都就住嚟用。「藍月亮」嚟緊周中英超又開快車對紐卡素，始終聯賽更加重要，今仗英足盃或略作保留，睇番佢哋日前英聯盃4強次回合小勝伯頓1比0，起用艾利真歷梅歷治、菲臘辛特拿、菲爾科頓等多名新仔，今仗隨時照辦煮碗，贏到即收韁。
般尼心繫護級玩死守
另一邊廂，雖然般尼喺聯賽位處下游，但近期確實弗番，連盃賽在內，近5仗取得4勝1和，絕對唔失禮，不過佢哋都心繫聯賽護級，可能玩死守求輸少啲就算，近5仗全開3球或以下，轉捧3.5球嘅入球細。