錫周三防線硬淨
周中踢完英格蘭聯賽盃4強嘅車路士同熱刺，今晚喺足總盃第4圈將分途出擊，衞冕盟主車路士主場迎戰英冠仔錫周三。咪睇車仔主場對低組別球隊就以為會大炒，查實佢哋近5次於英足盃對非英超球隊，有4次半場賽和0比0，表現慢熱，今場可以繼續追半場和。
（周一凌晨2時開賽）
車仔今季聯賽23場僅入40球，係Big 6之中最少，上圈英足盃主場面對另一支英冠球隊諾定咸森林，要到換邊後先由艾華路莫拉達梅開二度小勝2比0，表現欠霸氣。
錫周三近8戰5場零失球
為解決鋒力不足問題，領隊沙利一度轉打無鋒陣，不過狀態不及季初嘅夏薩特近期顯得獨力難支。新兵希古恩趕及註冊，今場可以上陣，呢位阿根廷前鋒雖然有質素，問題係始終要時間適應英國波節奏，火力料不會即時有太大改善。
錫周三近8戰只係輸1場，當中5場零失球，要攻破佢哋大門唔係咁易，而且呢班波近15場比賽有12次於上半場力保不失，車仔即使想強攻都未必咁快搞得掂，半場和絕對係好路之選。