曼聯自改由蘇斯克查出任看守領隊，極速反彈，連埋昨晨英足盃作客以3比1淘汰阿仙奴後，豪取8連勝。雖然好多人都事後孔明，話早知就早啲炒咗摩連奴，畀蘇B哥接手，可能成績更好，不過呢個世界係冇早知，依家怨摩佬係冇意思，更何況蘇B哥嚟到嘅時間係啱啱好。
首先，蘇斯克查唔係白紙一張，既有執教莫迪勇奪挪超冠軍嘅經驗，亦有中途接手卡迪夫城失敗嘅教訓，而且球員時代效力曼聯多年，熟悉球隊文化，更加容易上手。大家覺得紅魔炒摩佬炒得遲，但正因如此，先令蘇B哥領軍頭幾場只對卡迪夫城、哈特斯菲爾德、般尼茅夫等偏弱球隊，造就佢開個靚頭，球員亦慢慢有番信心，踢波除咗講實力之外，氣勢亦好重要，食住頭幾場贏波嘅勢頭，之後再戰勝強隊熱刺及阿仙奴，若果掉番轉先對勁旅，就未必連場報捷。
除此之外，蘇B哥今仗見到阿仙奴中堅柏柏斯達夫普路斯受傷，即叫左閘勞基梳爾將個波踢出界，讓對手治理傷勢，喺呢啲細微位，亦睇得出蘇B哥點樣教導球員，始終山水有相逢，無謂喺球場上結怨。有料又有品，難怪好運都跟住蘇B哥喇。