班霸拜仁慕尼黑喺安聯球場迎擊史特加，呢場係南部打吡，基於榜首多蒙特歇冬後首仗又贏波（未計算昨晚對漢諾威賽果），搞到聯賽6連勝嘅拜仁仍然未能拉近差距，而且得失球差亦大幅落後，想喺次循環收復失地爭取衞冕德甲，主場對「私房菜」史特加呢啲波不但冇失分空間，仲要盡量爭取大勝追近得失球差，今場「讓球主客和」拜仁讓到3球咁辣就知唔小嘢，一於博有2.47倍讓球主勝。
（on.cc東網周日晚10時30分直播）
拜仁歇冬後首戰作客擊敗賀芬咸，過程雖然唔算輕鬆，不過整體精神面貌明顯比去年底進步，雖然目前仍有洛賓、列貝利同哥倫天杜利素等傷兵，但前線仍然有足夠卡士攻擊手攻堅，已經表明想爭取教練尼高高華重用嘅「J神」占士洛迪古斯，今晚會得到兩個半月以來首次正選機會，必定打甩髀，何況拜仁向來恰死史特加，近15次喺德甲碰頭贏咗14次，唯一例外係上季煞科戰，拜仁穩得冠軍後嘅例行公事至輸番場，可見呢個對賽組合根本冇得揮。
客軍紙紮防線好易散
史特加今季持續低迷，去年十月已炒過一次教練（泰亞芬哥古特），現任主帥韋恩薛亞亦面臨被炒壓力，史特加目前排緊尾三，18戰只得14分已經刷新咗球會史上同期最差戰績，失38球更比上季全季失球多出兩球，防線曳到爆，尤其後防定海神針班捷文柏華特養傷後更如紙紮，近期聯賽遇上攻力一般嘅對手都3連敗共失8球，上仗歇冬後主場面對實力麻麻嘅緬恩斯都被轟入3粒，全場更處於捱打狀態，除門將薛拿演出水準已盡量減少失球外，其餘落場球員表現無一合格，今晚對住如狼似虎嘅班霸拜仁，難逃再次被大炒厄運。