今晚意甲壓軸大戰，「1哥」祖雲達斯作客拉素。祖記火力極強，唔係只靠基斯坦奴朗拿度（C朗）單天保至尊，撞正拉素有兩大主力坐波監，難擋氣勢如虹、近年對賽剋死佢哋嘅祖記來襲，客勝好路。
（Now 638、有線654及614台周一凌晨3時30分直播）
榜首祖記弗到漏油，開季20場聯賽未輸過之餘，仲贏咗18場，依家甩開次席嘅拿玻里9分。除咗轟入14球嘅C朗功不可沒，其他隊友一樣出色，包括上場聯賽對基爾禾交出2次助攻嘅保羅戴巴拿，被主帥阿里基大讚，而翼鋒杜格拉斯哥斯達亦轟入靚波，火力全開，對手都幾難頂得住。
拉素兩主力坐波監
相反，拉素唔單止上場聯賽以1比2不敵拿玻里，守將法蘭斯高阿沙比因2張莫須有嘅黃牌被逐，今場要連同鋒將阿當馬路錫齊齊坐波監，搞到主帥施蒙尼恩沙基頭都大埋。況且雙方近9次聯賽交鋒，祖記取得8勝1負，擺明格食格喇，今場可乘勢再下一城。