今晚西甲爆加泰羅尼亞打吡，「1哥」巴塞隆拿作客基羅納。巴塞日前西盃輸波畀人插到暈，隊長美斯抖夠復出，必搵基羅納發洩，隨時一開波即撳住搶，1.7倍半場客勝有計。
（Now 632周日晚11時15分直播）
講到巴塞近期最爆新聞，梗係爭贏財雄勢大嘅聖日耳門同曼城，簽入阿積士當紅炸子雞法蘭基迪莊。不過呢位荷蘭新星下季先正式加盟，而近期借入加納老將奇雲保定，亦都夠晒話題，佢喺上周中西盃8強首回合對西維爾擔正，諗住畀美斯休息，點知巴塞最終淨吞兩蛋堅肉酸，啱啱續約嘅主帥華爾維迪成為箭靶，今仗唔可以再甩轆。雖然前鋒奧士文尼迪比利受傷，但有美斯復出領軍，巴塞必求盡早攻陷對手冧番球迷。
近7仗聯賽皆由頭贏到尾
基羅納上周中西盃8強首回合同樣輸波，作客2比4不敵皇馬，連盃賽在內已經連續9場未贏過，上次贏波要數到去年12月頭，睇得出近況極曳。撇除西盃，其實巴塞喺聯賽相當穩定，唔單止近7場聯賽贏晒，而且全部都喺上半場已經領先，由頭贏到尾，啱啱西盃輸波成肚火，今仗定必搶韁，半場客勝有買趁早。