今晚喺阿聯酋舉行嘅亞洲盃爆發首場4強戰，伊朗火併日本。伊朗今屆雖然仍保持清白之身，但翼鋒泰尼米要坐波監，影響攻力，「藍武士」豪取5連勝，韌力十足，加上踏入淘汰賽，兩大高手過招勢必步步為營，而近年交手日本甚少輸波，日本受讓，必捧讓球客勝。（Now 670、Fox+、有線651及611台周一晚10時直播）
兩軍都係爭標大熱，呢場決賽戲碼提前喺4強上演，絕對係冠軍前哨戰。伊朗表現突出，今屆5戰取得4勝1和，無論係有4球進帳嘅王牌射手阿斯蒙，抑或迪查加、查漢巴克殊等個個都交足貨。而且葡籍主帥奎羅斯一向重視防守，伊朗今屆5戰未失過波，防守固若金湯，證明佢哋甚少犯錯，呢點喺淘汰賽堅重要。不過，喺8強戰贏中國3粒先開紀錄嘅翼鋒泰尼米，因累積兩張黃牌，今仗要停賽，對進攻肯定有影響。
另邊廂，近5屆3度封王嘅日本，主帥森保一採取以老帶新策略，倚靠經驗豐富嘅吉田麻也、長友佑都，帶住權田修一、富安健洋、南野拓實及堂安律等新仔，明顯處於磨合期，難免表現有起伏，但佢哋今屆5場贏晒，全部都煲魚生粥僅僅熟贏1粒，硬淨到暈。
藍武士雙箭復出調動靈活
而且武藤嘉紀坐完波監，大迫勇也好番晒，兩大前鋒可以候命，令森帥排陣有更多選擇。距離決賽只差一步，為免有乜閃失，預計今仗兩軍會踢得更小心，翻查佢哋近6次碰頭，各得1勝其餘4場和波，相信「藍武士」喺法定時間頂得住，仲有得受讓咁筍，日本讓球客勝咪錯過。