亞洲盃4強戰爆發西亞對決，東道主阿聯酋硬撼卡塔爾。阿聯酋上仗贏澳洲搏到殘，而且喺今屆法定時間內贏得兩場咁大把，相反卡塔爾5戰全勝兼保持清白之身，更有射手榜1哥阿莫斯阿里壓陣，今仗有力反客為主，客勝有計。
（Now 670、Fox+、有線651及611台周二晚10時直播）
阿聯酋攰爆冇霸氣
阿聯酋8強以1比0擊敗上屆盟主澳洲，但表現一般，入嗰球係拜對方球員自殺式回傳所賜，連同16強踢到加時先贏吉爾吉斯，佢哋真係攰到爆未回到氣。呢支東道主最大問題係攻力不濟，頭號球星奧馬鴨都拉文因傷冇入選，防線又唔算穩健，令到主帥沙哲朗尼巧婦難為無米之炊，毫無霸氣可言，因此能夠殺入4強，斯維覺得係超額完成。
另一邊廂卡塔爾就醒得多，今屆5場贏晒共入12粒之餘，難得係仲未失過波，可謂攻守兼備，好似8強面對爭標熱門南韓，佢哋有亞洲足球先生鴨都卡林哈辛及防中馬迪博停賽之下，仍然險勝1比0，韌力十足，今仗兩人刑滿復出，就算輪到巴森希沙姆及哈迪姆停賽都冇有怕。射手阿莫斯阿里亦弗到漏油，今屆已經入咗7粒，位列射手榜榜首，腳風超順，可擊敗東道主阿聯酋殺入決賽，客勝值得捧場。