英超周中開快車，周三凌晨紐卡素將於主場挑戰2哥曼城。「藍月亮」曼城同一時間要應付4條戰線，對球員體力消耗肯定好大，加上由「戰術大師」賓尼迪斯帶領嘅「喜鵲」紐卡素踢法不嬲保守，呢仗有力喺半場前守住曼城攻勢，半場和係好路。
（Now 621周三凌晨4時直播）
藍月亮4線作戰焗輪換
衞冕英超嘅「藍月亮」陣中人才濟濟，不過球隊仲要同時間面對英足盃、英聯盃同歐聯，賽程鋪排到密質質，為免搞到一班球員過度疲勞，領隊哥迪奧拿都逼住要進行輪換，好似季初受傷嘅奧達文迪、班捷文文迪同戴爾夫等，近期都多番機會上陣，但係輪換得太激烈，球員之間默契肯定有所削弱，變相影響球隊表現，為咗保持競爭力，睇怕哥迪奧拿都要諗諗計。
下游分子紐卡素排名聯賽倒數第4，為護級都仲要加多兩錢肉緊。「喜鵲」本身質素認真一般，出晒名孤寒嘅班主艾殊利又閂實水喉，唔肯注資為球隊增兵，「喜鵲」可否堅守英超席位，都真係好睇領隊賓尼迪斯嘅排兵布陣，呢位西班牙主帥出名戰術保守，近3次主場帶領球隊面對Big6勁旅，半場都成功逼和對手，呢場對住超班勁敵曼城肯定照辦煮碗，半場和捧得過。