車路士周四凌晨將會作客鬥中游球隊般尼茅夫。車仔爭前4腹背受敵，每場比賽都不容有失，希古恩（圖）同沙利故劍重逢有望提升進攻火力，何況車仔喺各項賽事近8次鬥般茅贏足7次，1.54倍客W咪嫌少。（Now 623周四凌晨3時45分直播）
車仔上場聯賽作客阿仙奴雖然輸0比2全失3分，但之後在英聯盃4強次回合擊敗熱刺，並憑互射12碼淘汰對手躋身決賽，上場英足盃亦於主場以3比0輕取錫周三，火速重上正軌。未計周三凌晨賽事，車仔落後3哥熱刺4分，同時只領先第5、第6位嘅阿仙奴及曼聯3分，一場勝負足以改變前4名形勢，就算作客一樣要全力搶3分。
車仔前鋒艾華路莫拉達已落實外借馬德里體育會，新加盟嘅借將希古恩上場對錫周三亦已正選落場，呢名阿根廷前鋒效力拿玻里時，與領隊沙利及中場佐真奴費路合作無間，對融入球隊應有一定幫助，有望加強埋門把握力。
般尼茅夫近8對賽輸7次
般尼茅夫於1月轉會窗分別由利物浦引入右閘尼達利基尼及前鋒蘇蘭基，不過後者因傷關係未曾披甲，前者加盟後3次正選上陣，球隊只得1勝2負，對改善後防幫助不大。自從般尼茅夫升上英超角逐後，面對車仔經常處下風，總計聯賽及盃賽，般尼茅夫近8次對車仔輸7次，包括3次主場出擊全部輸晒，車仔客W有1.54倍夠晒穩陣。