神奇4俠火力全開
今夜繼續有英超快車，焦點戰梗係榜首利物浦主場迎戰「狐狸」李斯特城。紅軍晏菲路出擊例搶攻，以穆罕默德沙拿為首嘅前線「神奇4俠」火力全開勁弗，可惜防線勁多傷兵，撞正有「紅軍剋星」占美華迪壓陣嘅李城，鬥攻格局實多波入，3.5球嘅大盤更值博。
（Now 621周四凌晨4時直播）
利物浦在主帥高普帶領下崇尚進攻，主場出擊尤其進取，加上佢哋於上圈英足盃出局，上周末未有賽事，可以話養精蓄銳等踢今仗，單計近4場於晏菲路球場出戰嘅聯賽，紅軍便狂轟16球，全開4球或以上，其中王牌穆罕默德沙拿及羅拔圖法明奴各入4球，沙迪奧文尼及梳頓沙基利亦各有3球進帳，前線「神奇4俠」經過磨合後顯露威力，令對手難以抵抗。
不過紅軍防線傷兵滿營，祖高美斯及阿歷山大阿諾特仍要養傷，客串右閘的占士米拿今場要坐波監，連中堅華基爾雲迪積克亦因傷上陣成疑，啱啱好番嘅中場法賓奴泰華利斯被迫要串演右閘，上場聯賽險勝水晶宮4比3，防線便罕見地連番失誤，可見傷兵太多影響唔細。
李城華Dee砌紅軍特醒
另一邊廂，李斯特城近5場聯賽4度敗陣，領隊佩爾地位愈來愈唔穩陣，為保帥位必搶攻爭勝，前鋒占美華迪唔單止係Big 6煞星，「華Dee」近6次聯賽對紅軍入咗7粒，絕對有本錢駁火，不妨直取中位數3.5球嘅入球大。