亞洲之王今晚誕生
阿聯酋舉行嘅亞洲盃今晚上演王者之戰，由「藍武士」日本硬撼西亞新貴卡塔爾。日本近5屆3度封王，經驗無疑贏晒，不過中場遠藤航因傷好大機會缺陣，撞正有弗爆射手艾莫爾斯阿里助陣、今屆賽事全勝兼未失過波嘅卡塔爾，冠軍戰講求穩陣，近4屆決賽全開半場和，值得再追。
（Now 670、有線611及651台周五晚10時直播）
日本今屆走來未算好有霸氣，但踢得唔好下都能夠贏波，頗有冠軍球隊特質，主帥森保一叻在畀大部分球員都有落場機會，藉此考察佢哋。由分組賽到8強呢5戰全部僅贏1粒後，去到4強對住勁旅伊朗終於見真章，早前表現一般嘅南野拓實交出2次助攻，協助復出嘅大迫勇也省兩粒，連同原口元氣錦上添花，日本清脆大勝3比0進身今日決賽。不過該仗酒井宏樹及遠藤航先後傷出，前者或可趕及復出，但遠藤航嚴重得多，甚至有傳要抖到3月，今仗相信鹽谷司會頂替佢嘅空缺，惟冇咗呢道中場屏障，森保一或會先加強防守，不敢冒進。
卡塔爾6戰未失過波
首度殺入決賽嘅卡塔爾表現令人眼前一亮，今屆6戰贏晒不特止，仲要未失過波，淘汰賽先後擊退伊拉克、南韓同東道主阿聯酋，唔講得笑。射手艾莫爾斯阿里大熟大勇，6場已經入咗8粒，不但高踞射手榜榜首，亦追平伊朗名宿戴伊單屆入球紀錄，今仗再入波就破紀錄，但要留意呢支2022年世盃主辦國擅踢5-3-2陣式，主打穩守突擊，若然日本都縮後嚟踢，未必有太多空位打反擊。
近4屆決賽全開半和
睇番雙方近8次交手，同得2勝4和2負，實力相差唔遠，而且決賽場合都唔想先失波陷於被動，必定更為保守。既然近4屆決賽全開半和，唔爭在追多次。若然想玩吓「冠軍」，日本近5屆3度封王經驗贏成條街，可支持佢哋捧盃而回。