今日下午嘅澳職獨腳戲，兩支下游球隊主演搶分騷，由西悉尼流浪者主場鬥紐卡素噴射機。西悉流近期走勢低迷，為重回正軌主場出擊必搶攻，可惜防線曳爆，對住同樣急搶分嘅噴射機，中位數2.5球大盤值博。
（Now 639、有線615及655台周五下午4時50分直播)
兩軍防線鬆散不堪
西悉流今仗有好消息，中場主力奇洛巴古斯刑滿復出，可惜佢哋近期走勢認真麻麻，近9場聯賽未贏過，場場至少失兩球，上仗對住布里斯班獅吼雖然止住6連敗頹勢，不過球隊喺大部分時間領先兩粒下，最後一刻畀對手連入兩球，嘔番兩分出嚟，士氣飽受打擊。西悉流近6仗全開3球或以上，既然中場保尼華斯亞連續4場有「士哥」咁順，不如以攻代守望擸3分。
上季季後賽決賽分子紐卡素噴射機今季成績勁跌Watt，近7仗僅獲1勝1和5負劣績，其中6場都有失波，防線鬆散程度同今場對手西悉流有得揮，兩軍失波當食生菜，中位數2.5球大盤梗係諗得過。