至於頭場紐倫堡主場對雲達不來梅，榜尾嘅紐倫堡勢窮力弱，連增兵都慢人半拍，歇冬後仲未有援兵幫手救亡，依家聯賽已經直落6連敗，成為降班膽。相反不來梅喺醒目少帥高菲特帶領下愈踢愈有朝氣，成班小將輪流上位，上輪狂攻強敵法蘭克福雖然只係2比2言和，但水準同可觀性之高譽滿全國傳媒，今晚遇弱可以重返勝軌，客W值得支持。
（on.cc東網周六晚10時30分直播）
艾格史甸兄弟齊上位
不來梅少帥高菲特領軍後表現同成績一直穩步上揚，佢帶不來梅青年軍出身，敢於起用新人，球隊由經驗豐富嘅麥斯古斯帶領下，小將輪流上位，近期最受注目嘅，係艾格史甸同祖漢斯艾格史甸呢對兄弟兵，上輪齊齊擔正舞到哈化柏林班後衞亂晒龍，德國傳媒一致畀高分，認為以佢哋嘅表現值得升上更高位置，甚至值得歐洲賽事入場券。高菲特歇冬期索性將佢甚少重用嘅26歲好波之人科利安卡恩斯賣斷畀科隆，擺明留番位畀新人競爭，今晚恃勇出擊，作客都值得睇好。
紐倫堡攻守都弱，敬陪末席之餘，對增兵亦慢半拍，當一眾護級對手包括漢諾威、史特加同奧格斯堡等喺歇冬期連番借將成功後，佢哋直至3日前至宣布簽入32歲嘅前漢堡中場伊利斯域，仲相信係唯一新兵，不過佢過去兩年只係喺水準甚低嘅哈薩克聯賽效力，而且已經4個月冇比賽，今仗賽前仲話喺訓練中負傷，暫時都幾難救到紐倫堡。