今晚西甲大戰，榜首巴塞隆拿主場迎戰「蝙蝠兵團」華倫西亞。巴塞喺聯賽順風順水，唔單止豪取8連捷，而且全部都喺上半場領先由頭贏到尾，隊長美斯仲連續15仗聯賽奉獻入波或助攻，勁到癲，隨時半場就KO華倫，半場主勝更值博。
（Now 632周日凌晨1時30分直播）
美斯連續15場入波或助攻
巴塞近期喺聯賽表現堅穩定，近8場聯賽全勝，入23球僅失2球，關鍵在於8戰都喺上半場已取得領先優勢，為贏波奠下基礎。今次聯賽8連勝，亦係主帥華爾維迪上任後最長連勝紀錄，而經過上場聯賽輕取基羅納2比0後，隊長美斯已經連續15場聯賽都交出入球或助攻（13球及7次助攻），弗到冇朋友，加上日前喺西盃8強更狂數西維爾6比1，兩回合計反勝6比3晉級，連早前沉爆嘅菲臘比古天奴都弗番省兩粒，士氣大振。
另一邊廂，雖然華倫西亞同樣進身西盃4強，但仍有加美路、干度比亞及高基連等養傷，上季勁弗嘅干卡路古亞迪斯今季傷多過踢，就算近日已復操但狀態成疑，「蝙蝠兵團」近8場聯賽贏得3場咁大把，如果單計作客，近4場只得1勝1和2負，其中3場都喺上半場落後，今場造訪堅惡頂嘅魯營球場，隨時半場都頂唔住，半場主勝有捧趁早。