德甲直播尾場史浩克04主場鬥慕遜加柏，上半季戰績低落嘅史浩克近期成績總算回穩，箭頭馬克烏夫傷愈後上輪已經交出極大威脅同入波，不過目前成績仍然無法同球迷交代，今晚主場必然搶攻博3分，遇上當弗又擺大頭求勝嘅爭霸分子慕遜加柏，預期係一場可觀嘅入球騷，推介中位數2.5球大盤。（on.cc東網周日凌晨1時30分直播）
史浩克今季演出令人失望，少帥泰迪斯高放棄老將倚重新人，球隊雖然鬥志可嘉，整體演出仍然雜亂無章，近期採取全攻型踢法求收復失地，但防線又欠穩，近8場聯賽都有入波同失波，好在射手馬克烏夫復出改善火力，上輪作客哈化柏林交出上佳演出，挾近3輪攻入7球同連搶7分強勢，今晚回師主場當然唔會龜縮啦！
慕遜加柏3叉戟搶攻
慕遜加柏歇冬後兩戰全勝，仍然穩居聯賽榜第3位，分別落後前兩名多蒙特同拜仁9分同3分，仲有15輪比賽，當然唔會放棄爭霸機會，今晚佢哋決定排433陣式擺大頭求勝，前線隊長史甸度拍住一對高產射手柏利亞同杜根夏薩特攻堅，3叉戟今季聯賽已合共轟入21球，而且各有唔同風格，令對手防不勝防，今晚要攻破史浩克欠穩嘅防線難度唔高，大盤值得支持。