上周中英超快車多場爆冷，其中曼市雙雄齊齊失分，弗到震嘅曼聯只能逼和般尼2比2，曼城更加以1比2反輸畀紐卡素，但佢哋各有目標，預計會一齊贏波反彈。
蘇B揸旗紅魔鬥心強
先講頭場曼聯作客李斯特城，雖然紅魔上仗意外和波，但查實佢哋去到81分鐘落後到0比2，竟然喺末段連追兩粒，算係有尾運，其中域陀連迪路夫扳平後即刻拎住個波，急急叫隊友跑番去中圈，可見佢哋仍有想贏波嘅決心，儘管最終失分收場，不過士氣未減，證明在蘇斯克查領軍之後，眾將鬥心遠勝摩連奴時期。而且8連勝斷纜，既可讓紅魔減減壓，亦能讓佢哋望清楚連勝所掩蓋嘅問題，絕非壞事，今仗造訪表現飄忽嘅「狐狸」，可贏波而回。
至於尾場曼城主場迎戰阿仙奴，「藍月亮」爆大冷輸畀紐卡素，不過「1哥」利物浦喺上周中快車亦只能賽和李斯特城1比1，因此只被甩開少少至落後5分，而非7分，算係不幸中之大幸，令佢哋爭冠尚未斷氣。
另一邊廂，阿仙奴仍處於動盪時期，攻守不平衡表現反反覆覆，曼城吸取上場賽事輕敵導致反勝為敗嘅教訓後，今仗應該唔會再大意，不妨整條曼市雙雄W過關2串1，臨近歲晚贏番啲壓歲錢過年。