今晚西甲壓軸尾場，皇家德馬里主場對艾拉維斯。「銀河艦隊」箭頭賓施馬近期頻頻士哥，剛登上球隊史上射手榜「6哥」，弗到漏油，艾拉維斯近況低沉，難以阻擋皇馬狂攻猛打，就算讓2球照捧讓球主勝！
（Now 632周一凌晨3時45分直播）
皇馬聯賽連盃賽4連勝狀態回勇，上仗西盃淘汰基羅納，殺入4強將同巴塞合演「國家打吡」。射手賓施馬近3仗轟5粒，令佢喺「銀河艦隊」生涯累積入209球，超越名宿曉高山齊士進佔球隊史上射手榜「6哥」位，僅次於C朗、魯爾及迪史堤芬奴等猛人，唔講得笑。自稱「我係一個有10號靈魂嘅9號中鋒」嘅賓施馬，唔單止識入波，喺以往C朗在陣時，佢就不斷交出助攻及走位拉空對方防線，依家承擔埋入球重責，難怪近日獲主帥蘇拿利大讚：「我有啲朋友依家先覺賓施馬好波，不過依家先知都未遲。」
周中撼巴塞前要振聲威
未計尋晚賽事，艾拉維斯聯賽暫列第5其實唔曳，但近7仗贏得兩場咁大把，狀態明顯回落，而且後衞洛迪高伊利及阿祖安馬連仍要養傷，啱啱為日本踢完亞洲盃嘅新兵乾貴士，相信都趕唔切披甲。何況艾拉維斯之前兩次聯賽造訪巴拿貝球場，合共吞咗7蛋，弗爆賓施馬仲唔趁機數胡咩？皇馬嚟緊周中就要喺西盃對巴塞，今仗勢必盡快數多幾粒，讓球主客和讓兩球，照撐讓球主勝。