失分減壓繼續衝
周日晚英超頭場，氣勢如虹嘅曼聯作客「狐狸」李斯特城。曼聯喺蘇斯克查領軍豪取8連勝後，上周中打和般尼，但此役喺落後0比2仍然可以追和，反映紅魔鬼可以踢逆境波，「魔性」完全歸位，相反李斯特城愈踢愈沉，曼聯讓平半上盤抵玩到極。
（Now 621周日晚10時05分直播）
自從上年年尾蘇斯克查接手後，曼聯從谷底反彈，呢位球隊名宿領軍8場取得全勝後，上周中2比2逼和般尼，其實呢場和波絕對嚟得合時，首先和波過程係紅魔落後2粒追和，證明隊波喺蘇斯克查執教後，唔止淨係識踢順境波。第二，用一場周中波失分，某桯度上球迷可以接受得嚟，亦減輕咗連勝壓力，對球隊反而係好事。
李斯特城愈踢愈沉
曼聯重拾久違咗嘅進攻打法，除咗激活保羅普巴、拉舒福特等中前場主力外，連久沉的阿歷斯山齊士，在英足盃倒戈贏阿仙奴3比1之役亦有士哥，「蘇B」強調曼聯永遠都以奪冠為目標，就算今季很難完成，亦要盡力搶分保持強勢，戰意必堅。
相反，李斯特城近況低沉，連盃賽在內，近6場只得1勝1和4負，主帥佩爾亦不得民心，眾將未必為他賣命，今場雖然有泰利文斯來投，但難望有即時效用，「狐狸」難擋「紅魔」來犯，曼聯上盤不容錯過。