阿仙奴有前冇後
今晚英超壓軸大戰曼城主場對阿仙奴，曼城今場讓到球半/兩球認真誇張，話晒阿仙奴都係Big6之一，唔通真係毫無還擊之力？不過睇過阿仙奴上次災難性輸畀利物浦1比5，真係對兵工廠嘅防線冇乜信心，今場一於簡單捧個3.5球中位數入球大，睇場好波開心過肥年。
（Now 621周一凌晨零時30分直播）
今次阿仙奴受讓球半/兩球，相信係馬會開盤以來阿仙奴受讓最多嘅一次，雖然兵工廠係英超Big6之一，但其實6隊當中都有高低，尤其係阿仙奴嘅防線卡士完全不足，今季11場聯賽作客全部都有失波，近19場聯賽作客更係輸咗11場之多，齋睇呢個數字都覺得相當恐怖，曼城讓咁多唔係冇原因。
兵工廠防線傷兵多
更令人擔心嘅係，阿仙奴傷兵情況嚴重，尤其防線冇咗哥斯尼、柏柏斯達夫普路斯、比利連及洛賀丁等人，要靠梅斯達菲、蒙利爾同列治史迪拿撐住條防線，令原來已經唔穩陣嘅防線更加千瘡百孔，雖然呢個世界上牌面弱唔代表輸硬，但阿仙奴從來唔係一支識得泊大巴嘅球隊，亦甚少可以放低尊嚴踢擦鞋仔波，所以佢哋今場想殺出條血路甚為困難。
不過，阿仙奴亦唔係完全冇優點，起碼今季前線就交足功課，奧巴美揚同拿卡錫迪已合共交出25個入球，樂比唔太擔心阿仙奴今場會冇波入，只係入埋都唔夠防線輸咁解，所以今場最佳玩法都係向大盤埋手。
另一邊廂，曼城上周中意外不敵紐卡素，幸好利物浦亦失分不致被拋離，目前曼城落後榜首利物浦5分，真係一分都不能少。雖然曼城近期嘅表現好似有啲飄忽，不過佢哋主場出擊仍相當值得信賴，今季12場主場聯賽射入40球，分分鐘淨係靠自己都開到大，阿古路過往對住阿仙奴亦如魚得水，對賽共入過7球，今場對住兵工廠條豆腐防線又係佢發威之時。