睇住入球騷過豬年
今日年三十晚食過團年飯，去到凌晨踏入大年初一，就有英超「1哥」利物浦陪大家過新年，作客硬撼「錘仔幫」韋斯咸。紅軍喺上周中聯賽快車意外失分，為爭冠不容再失，但防線傷兵頗多，隨時以攻代守，況且近年對韋斯咸例多波入，不妨捧中位數2.5球大盤，睇住入球騷過豬年。
（Now 621周二凌晨4時直播）
利物浦今季表現非常穩定，開季至今聯賽只係輸過1場咁大把，雖然上周中快車未能乘住次席曼城輸波，佢哋只能打和李斯特城1比1堅唔抵，錯失拋離7分嘅良機，但未計今輪賽事，點都叫再甩開少少領先曼城5分，唔算太壞，不過今仗冇得再大意。王牌穆罕默德沙拿堅弗，單計聯賽作客，呢位埃及射手近4仗客場入咗5粒，只係防線傷兵滿營，阿歷山大阿諾特啱啱先復操趕唔切上陣，兼且祖高美斯同洛夫雲仲傷緊，右閘無論搵法賓奴泰華利斯或佐敦軒達臣客串，都唔慌穩陣。
近4聯賽相遇全3球或以上
另一邊廂，韋斯咸雖有射手阿拿奧杜域留隊，可惜佢同韋舒亞、耶莫蘭高、盧卡斯佩雷斯都有傷，韋舒亞更有傳可能提早收咧，而且佢哋聯賽連盃賽在內，近3仗全部輸晒，包括英足盃畀英甲仔AFC溫布頓踢出局，士氣唔慌好得去邊。翻查紀錄，兩軍近4次聯賽交手，利物浦贏晒之餘，全部都至少贏3粒之餘，仲全開3球或以上，客勝太奀冇肉食，捧讓球客勝又唔多穩陣，既然兩軍交手例多士哥，轉捧2.5球嘅大盤，開過靚頭。