周三凌晨法國波好戲連場，阿King同大家提供過關心水；法甲上演一仗由馬賽主場火併波爾多，馬賽多位進攻主力缺陣，火力肯定大打扣，況且波爾多近期狀態麻麻，預計兩隊戰況隨時陷入膠着，和局絕對捧得過。
（Now 639、有線615及655台周三凌晨2時直播）
馬賽今季表現飄忽，情況踏入2019年都未有好轉，尤其近期主場走勢曳爆，聯賽連各項盃賽近5仗主場未贏過。為擺脫頹勢加強球隊搶分能力，馬賽冬季轉會窗就簽入巴洛迪利，不過有留意呢位意大利前鋒嘅球迷，都知「巴神」場上表現同情緒一樣難以捉摸，加上進攻雙核心皮耶同泰奧雲，一個有傷另一個停賽，要靠「巴神」揾食隨時冇運行。馬賽近6次對波爾多，有5次最終都難分勝負，今次好大機會再和局收場。
南特旺「細」持續
同日仲有多場法足盃16強賽事上演，其中南特將會主場鬥圖盧茲。南特失去阿根廷前鋒伊美利安奴沙拿之後，前場攻力大減，近6場比賽全開2球或以下，今場入球細值得追捧。（Now 638、有線614及654台周三凌晨1時30分直播）最後仲有梅斯主場迎戰奧連斯，梅斯今季走勢強勁高踞法乙榜首位置，有力將好狀態帶到法足盃賽場，果斷揀主勝。