4線作戰贏到即收油
今晚英超都有賽事，「2哥」曼城作客力鬥「拖肥」愛華頓。曼城趁住榜首利物浦接連失分，追至只落後3分，但「藍月亮」賽程頻密，一班球員要同時應付多條戰線容易現疲態，今場只求3分不求大炒，分分鐘領先後就收油；愛華頓近況麻麻難當「攔路虎」，捧中位數3.5球入球細好過。
（Now 621周四凌晨3時45分直播）
今季英超爭霸相當激烈，「1哥」利物浦畀韋斯咸逼和後，曼城已經將兩隊距離縮窄至3分，連同「3哥」熱刺，邊隊可以季尾封王仲有排鬥。曼城今晚只要作客擊敗「拖肥」愛華頓，就可以喺打多1場情況下，憑較佳得失球重奪英超榜首之位。
同上季相比，曼城今季戰績稍為跌Watt，主要係作客較為飄忽，繼早前輸過畀李斯特城，上一場作客亦喺領先情況下，最終畀紐卡素反勝嘔晒3分出嚟，嚟緊作客必會踢得更為謹慎小心。而且除英超外，「藍月亮」同時要應付歐聯、英足盃同英聯盃幾條戰線，球員體能消耗大，如能領先都唔會再搶攻，簡單以3分做目標。
愛華頓主場遇強泊大巴
季前引入多位猛將嘅愛華頓，一直視爭取歐戰資格為目標，不過今季「拖肥」球迷睇怕又要再次失望，皆因球隊依然擺脫唔到表現欠穩嘅問題，近6仗聯賽主場只獲1勝2和3負，加上中場猛將伊祖沙古爾有傷在身或缺席今仗，冇佢在陣中場爭搶能力肯定削弱，主場對住勁旅曼城，縮後「泊大巴」唔出奇。既然曼城近8仗作客有7次開3球或以下，中位數3.5球嘅細盤諗得過。